Actualmente, as condicións laborais dos 165 traballadores e traballadoras de Insuiña están reguladas polo convenio estatal de acuicultura, que son «moi inferiores» ás dos convenios de empresa doutras sociedades do Grupo Nueva Pescanova.
Malia os intentos sindicais por negociar un novo convenio, a dirección de Insuiña non accedeu. CCOO atribúe a esta «intransixencia» da empresa o crecente «malestar» entre o persoal, polo que as mobilizacións serán a mellor fórmula para que a empresa «tome en consideración as reivindicacións».
Paros, concentracións e folga
O persoal decidiu convocar paros e concentracións fronte aos centros de traballo o vindeiro martes, 20 de novembro, entre as 14:30 e as 15:30. Unha semana despois, o martes 27, as traballadoras e traballadores están chamados a 24 horas de folga e a se concentraren de 13 a 14 h fronte ás plantas de Insuiña.
A empresa
Insuiña é nestes momentos a maior produtora de rodaballo en España e, xunto con Acuinova Portugal —do mesmo grupo—, tamén de Europa. En Galicia dá traballo a 165 persoas, a maior parte no concello lugués de Xove (110 traballadores e traballadoras). O resto do persoal distribúese entre as plantas de Chapela (Redondela), con dez persoas, O Grove, tamén con dez, e Mougás (Oia), con 35.
CCOO é o sindicato maioritario
Comisións Obreiras é o sindicato maioritario nos comités de empresa, con sete representantes dos dez totais. A continuación, dous representantes da CIG e un máis baixo unha candidatura independente.